人生有時好似天氣一樣，變幻莫測，經歷情緒困擾都係一樣。外面好炎熱，望到外面嘅小朋友响公園玩得好開心，但我個心就落雨落唔停，欲哭無淚，開始萌生一啲負面嘅諗法，「唔通我一世就係咁過？」呢一份不甘心令我去尋求協助。
某輔導員第一次見面時，我坐低之後，輔導員好快就畀表格我去填：姓名、地址、電話…好多資料需要填，幾版紙嘅問題寫左我一段時間。
輔導員好唔耐煩同我講：「仲有15分鐘就要完結呢次輔導，無論有無處理任何問題都要收全費！」
我驚到心跳得好快，放低筆，抬頭望下個鐘：「啊！原來唔經唔覺已經過左30分鐘，點解你唔預先講我知填表係計時間？」
「係咁，唔好再填呢份啦，人地填表都係10分鐘左右，都唔明你點解填咁耐都未填完。依家比另一份你，呢份要即時填左佢！」
當我打開一睇---不自殺契約？！心好似石頭咁沉左下來，手拎住呢份沉重而冰冷嘅表格，第一次我地咩都無傾過就想我承諾嘢？
我坦白同輔導員講：「依家我唔會簽呢份不自殺契約。」
佢好疑惑嘅眼神望住我：「點解你唔簽？如果你自殺而事前又無同我講，我會覺得好遺憾。」
「究竟呢份嘢簽完係當我發生事上嚟保障你免去責任，定係你真心想我响想自殺時搵你？如果我同你關係好，我唔簽都會第一時間去搵你。但第一次見面我未同你熟絡，呢份文件我覺得好冰冷，我會同你建立更深嘅關係時，先再考慮簽定係唔簽。」
於我而言，真正嘅關心係會尊重當事人嘅選擇，陪伴、聆聽，以及共同經歷不一樣嘅旅程。
by Chocolate
Comments