我仍然相信自己，相信復元人士係有能力工作

按醫生、社工同輔導員嘅指導下，我嘅情緒慢慢開始穩定落嚟。佢地評估過我嘅能力，而我一直都覺得坐响屋企咩都唔做，對病情無幫助，甚至會惡化同繼續胡思亂想⋯⋯所以我就決定嘗試出去搵工。

鈴鈴鈴⋯⋯收到電話有面試機會，就有多個機會可以工作。我懷住期待嘅心情去見工，一路面試時見到面試官都好滿意我嘅對答。最後佢問我有冇問題想問返佢。

「我⋯⋯我本身有情緒困擾，需要一個月最少請一日假去見醫生、社工。如果貴機構請我嘅話，可唔可以配合一下？我會繼續用知識同心力，盡力去做我嘅工作㗎！」

佢一聽到之後，面容立即變黑，好惡咁同我講:「你有精神病，憑咩可以勝任呢份工作？你能唔能夠擔保自己响工作時間唔發病，確保唔影響公司運作？」

當時我嚇親，細膽咁講:「我⋯⋯嗯⋯⋯每個人都總有自己嘅困擾，我都一樣。就算有困擾都唔等於做唔到野，你地都係一間鼓勵院友出去工作嘅機構，點解偏偏接受唔到員工响有情緒困擾下，仍然可以好好咁工作？」

我一次又一次去見工，一次又一次被僱主去批判患有精神病嘅人係無能力。我再度懷疑自己，係咪我做錯嘢？係咪我真係完全無能力？坦白同對方講我嘅需要有錯咩？點解呢個社會上有好多人患有唔同嘅病都可以返工、都可以有人請？而我就唔可以？係咪真係完全唔講自己嘅病先係最好？請咗我之後如果被老闆發現，都會用另一種眼光睇我時，我承受到同事嘅壓力咩？當我睇醫生請假，唔通要攞年假先可以覆診？

掙扎中，我選擇坦白咁面對自己，面對世界，只因我仍然相信自己，相信復元人士係有能力工作，係應該得到公平嘅待遇。

by Chocolate