深深吸一口氣，我同自己講：「最後一年，唔可以有任何差錯令自己畢唔到業！」
唔知由邊日開始做咩都無心機，為咗唔畀人知道我喊，無心機，就上堂扮訓覺。扮到無得再扮，就決定離開課室。行到去海邊，腦入面浮起一句：「點解我控制唔到自己情緒，做唔到卓越嘅一面？」
有一日，朋友問我有無時間陪佢覆診，我見自己都無心機上堂，又難得佢主動邀請就跟佢去。一去先知朋友原來係响精神科覆診 - 精神科？！
我好疑惑，問朋友：「點解你會揾我陪你覆診？你好地地，做咩無啦啦要睇精神科？你唔怕其他人知道你有精神病咩？」
朋友捉住我雙手，同我講：「我想你知道，睇精神科醫生同其他醫生都係一樣，點解要覺得疑惑呢？喂！你都係人，呢刻唔舒服就畀自己睇醫生休息一下，唔好再迫到自己咁盡。你仲年輕，當你好返之後再努力，深信身邊人都會感受到你嘅熱誠同卓越。」
我發現自己接納唔到自己有軟弱嘅一面，成日活响別人嘅眼光中，唔放過自己。
响朋友陪同下去睇醫生，醫生見到我嘅情況，建議我即時入院，我心裡面覺得好猶豫。
當我講畀爸爸媽媽知道我要入院治療，佢地好驚訝！嚴厲咁同我講：「細妹，你咁正常點解要住院？咁年輕入去住，一住你就一世就背住精神病病人嘅標籤响身！到時候出面唔會有人請你返工，就無前途，我地唔想你畀人覺得你係痴線！」
當時我喊住同他們講：「爸爸媽媽，一直以黎我响屋企扮開心扮無事，唔想大家擔心我。但呢一刻我好想同你地坦白，同樣我都好努力接受自己需要休息、醫治。我明白你地好擔心我前途，容許我休息過後再努力過，可以嗎? 」
展開治療嘅一步，看似軟弱，其實係一種勇敢。
by Chocolate
Comments