受情緒困擾嘅朋友，踏出第一步接受治療好多時都需要勇氣。可能你會覺得好緊張，或者好擔心，咁都係好自然嘅，心裡面可能有好多個問號：唔知第一次會談係點嘅呢？有冇咩要準備？
1. 大膽發問
如果喺面談過程中有咩疑問，都可以放膽問服務提供者，呢個係服務使用者嘅權利，服務提供者亦都有責任要回答。不論係關於我地嘅狀況、有關精神科藥物嘅特性，抑或係問佢地嘅專業資格、有冇處理相關情況嘅經驗、治療嘅方向、聽唔明嘅專業用詞嘅解釋等等，都可以提出來一齊討論。
以下係一啲常見嘅問題例子:
問精神科醫生嘅問題: 「呢隻藥有咩副作用架？有冇第二啲選擇？」
問臨床心理學家嘅問題: 「點解我會有呢個情況？你會用邊種心理治療方法去幫我？呢個方法係咪實證為本架？」
2 .事前準備
如果有啲嘢唔知點開口，或者驚唔知從何說起，我地可以選擇事先寫低一啲重要嘅資料，帶去俾服務提供者。佢地會就住我地俾嘅資料進一步了解我地嘅情況。當然寫唔寫純屬個人喜好，我地隨心去到講想傾嘅嘢又得。如果有啲事情未有準備講出來，絕對唔緊要，每個人嘅步伐都唔一樣，我地有權選擇講啲咩、唔講啲咩、幾時講、同邊個講，按自己嘅步伐就得架喇 ，唔需要迫自己一次過講晒所有嘢架。
3. 保密協議
根據精神科醫生同臨床心理學家嘅專業操守，服務使用者嘅資料會以機密方式處理與保管，只有喺得到服務使用者同意嘅情況下，先至會視乎情況需要提供俾相關嘅人士。只有特殊情況下係無法保密，例如當服務使用者有機會危及自己生命（服務提供者有責任聯絡其親人）、當服務使用者有機會危及他人生命、或當個案涉及法律責任（例如法庭下令提交心理報告），否則服務提供者都應該嚴格遵守保密協議。
4. 合理期望
好多時喺我地鼓起勇氣接受治療之前，情緒困擾已經維持咗一段時間，我地會好想搵個最快好返嘅方法（quick fix）。但係當我地越心急、對自己嘅情況越唔接納嘅時候，往往會令到自己壓力更大，好想快啲好返但覺得咩都幫唔到自己，反而覺得更加無助、絕望。所以我地要對治療盡量保持合理嘅期望，每個人、每種困擾嘅改善速度都唔同，而喺過程之中有唔舒服係好正常嘅，因為我地要觸碰一啲令我地受傷、擔心嘅事，過程中會有高高低低，實在係唔容易。
盡量運用呢個空間同時間，唔使擔心自己脆弱、流淚、憤怒、失控，因為服務提供者會陪我地走過。試下保持一份平常心，視治療為一個機會俾自己去好好休息、更加了解自己嘅需要、學識更好咁照顧自己。
5. 主動參與
有唔少人會覺得服務提供者係專業人士，對佢地講嘅嘢深信不疑，或者有唔認同都唔敢講出嚟，但其實治療嘅主角係服務使用者，每個人都係「自己」嘅專家！服務提供者會同我地一齊探討困擾嘅嘢、成因等等，然後一齊搵一個改善方向。所以我地提供嘅意見同資料，例如試過咩方法幫自己、邊啲有用邊啲無用，係咩情況困擾得最犀利、咩情況會好啲，呢啲都係好寶貴嘅回饋，係我地每個人獨一無二嘅資源，俾服務提供者更加了解同明白我地，進一步優化治療。治療嘅目標都係有彈性嘅，可以隨住治療進展而有所調整。
6. 按你步伐
有時服務提供者會安排一啲練習，或者邀請我地做一啲「實驗」，等我地更加容易掌握到重點，為下一次會面提供有用嘅材料。如果我地冇做到，或者做唔到呢啲「功課」，唔緊要，即管提出嚟傾，服務提供者會同你一齊討論、調整。當然啦，服務使用者都有責任盡量去嘗試㗎。
7. 嘗試改變
喺治療嘅過程之中，進展好多時發生喺我地想改變嘅一刻。服務提供者會同我地探討有咩因素維持緊個困擾（可能係不自覺嘅行為或思想習慣），當我地察覺到呢啲慣性模式，就可以慢慢選擇去打破佢地，試下另一啲更好嘅方法。當然，改變並唔容易，因為有啲習慣都跟咗自己好多年，甚至係曾經幫我地渡過以往艱難嘅「生存技能」。但係，我地要相信，以前用開嘅方法唔一定時時都用得著，我地可能需要唔同嘅方法去更有彈性咁回應生活。我地可以問下自己：如果維持現狀嘅話，快樂嗎？如果係，咁不妨繼續。如果唔係，咁想唔想快樂啲？如果想嘅話，咁就要試下改變一啲嘢，即使只係由一個好微小嘅改變開始。
8. 起伏中成長
同傷風感冒一樣、同人生一樣，心理治療好多時都唔係一路直線向上，會有高高低低，過程中我地會預計到有唔同嘅起伏，會經歷順境同挫折。好似之前介紹「復元」時提及過，有所謂嘅「退步」係可以嘅，低潮嘅時候唔需要責怪自己，亦唔需要怕俾服務提供者知道自己情況冇好轉或者轉差，坦白話俾佢地知就可以喇。因為最重要嘅係我地每次都可以喺經驗入面學習，而呢啲經驗都係令我們成長嘅養分。就好似人生咁，有冇情緒困擾都好，其實每個人都會有高低起伏，人總係喺起伏中成長。
Comments