讀者問：
家人長期情緒低落，催佢去見社工/睇醫生佢都唔肯，我仲可以做啲咩去幫佢呢？有冇其他資源/網上服務可以幫到佢？
說書人分享：
知道家人或身邊嘅人有困擾，但又未有方法，我地可能都會有心急嘅感受，而呢一份心急亦好多時出於我地對對方嘅關心。當我地留意到自己心急嘅同時，亦可以提醒番自己，每個人嘅步伐、需要嘅空間同時間都唔一樣，尊重每一個人嘅選擇。
我地可以為對方提供唔同嘅方法或資源，然後容許對方有個空間同自主權去選擇。要尋求協助並唔係輕易嘅事，尤其香港污名咁嚴重，都需要好多勇氣先會尋求協助，好多人由開始有困擾到求助可以用好多時間，背後可以有好多擔心、無助、恐懼。
再者，未必每一個人都想選擇求助，嘗試信任對方，學習做一個聆聽者，都係重要嘅一步。