呢D病名聽得多，但係你了解既有幾多，誤會既又有幾多？ (大家睇完可能會覺得自己中左幾樣咁，其實呢個反應係好常見，正如有時睇其他生理病嘅病徵時都會覺得自己中少少咁。有無病唔係自己講嘅，而係由專業人士判斷，假如你嘅情緒受到困擾，日常生活開始受影響，就考慮搵人幫手啦。)
精神分裂症
精神分裂症並唔係分裂左好多個人格，大家實在太受TBB同24個比利影響啦。有精神分裂症唔代表痴線，而係因為腦內化學物質同腦部生理出現錯亂失調，係情緒行為上反映到有思考同知覺既障礙，徵狀包括妄想，幻覺，混亂言語，同埋一D負性症狀，例如：缺乏專注力，目無表情等。精神分裂症係可以治療既，好似我地傷風感冒咁，只要定時食藥，病情可以好穩定，睇唔出同一般人有咩分別，依然可以過一個有意義既生活！
坊間經常將精神分裂症同危險暴力掛勾，事實上大部分有精神分裂症既人都好似我地咁，照常返工返學，過一般人會過既生活，唔會傻笑、自言自語、搞破壞、傷害其他人。我地以往聽到既誤解係來自傳媒過份誇大佢地既危險性，新聞睇到既都只係少數既例子。
邊緣人格障礙
有邊緣人格障礙嘅人情緒會大上大落，難以控制衝動，自我形象低落，有強烈嘅空虛感同孤單感。為左唔被人遺棄，佢地會有比較激烈嘅行為，可能會有好多唔穩定嘅親蜜關係，亦有部份會因為覺得好難去控制或者唔識去表達自己既情緒而有自殘行為。俾火燒傷既人，皮膚被輕輕一碰，都痛入心扉。有邊緣人格障礙嘅人，心靈就好似俾火燒過一樣，一件睇落係好小既事（例如朋友臨時唔得閒一齊食飯）都會觸動到佢哋，覺得對方唔鍾意自己。呢種感覺好強烈，伴隨住強烈嘅驚、傷心、心痛、嬲。強烈嘅情緒會令佢地不自控咁做出激烈嘅行為，例如不斷打電話俾對方、鬧對方、以死相迫，但之後又會後悔，於是做返好多野嚟補償。 好多看似係操縱人嘅行為，其實都係受人格障礙影響。
有邊緣人格障礙嘅人總係有一種空虛嘅感覺，雖然佢地可以好快咁同人建立到關係，但同時又好擔心對方會嫌棄自己。呢啲大上大落嘅情緒、來來回回嘅人際關係，除咗令身邊嘅人無所適從之外，佢哋自己亦都承受住極大嘅痛苦。佢地好擅長啲比較表面既社交相處，但當了解得比較深入時，佢地好多時就會被指摘「你唔好再seek attention啦」、「點解你D關係咁混亂架，尊重下自己啦」。 邊緣人格障礙以及其他人格障礙並唔係坊間認為既「無得醫」，臨床實證話俾我地知心理治療係有效改變其思想、情緒同埋行為。雖然治療過程比較漫長，作為朋友或者身邊嘅人，可以鼓勵佢哋見臨床心理學家，有耐性咁陪伴住佢哋，要有信心係可以有轉變既。
創傷後壓力症
當人親身經歷過或者目睹過極具威脅性、生死攸關嘅事件（例如天災、暴力事件等），或者係佢地既至親密友經歷過呢 D 事之後，多數人都會有壓力反應，唔係得軍人先會患上架。
壓力反應包括平日／發夢會諗起嗰件事嘅情景，呢種「諗起」可以叫做「閃回」(flashback)，即係好似案件重演咁，會睇到、聽到、聞到，甚至感覺到當時嘅細節，好真實；因為唔知幾時會再「閃回」，所以精神會好緊張、容易嚇親、忟憎、瞓唔到；有時會想收埋自己，尤其係會避開令佢哋諗返起件事嘅嘢，例如經歷過交通意外之後，會唔敢再搭車；有D人會麻木左，感覺唔到任何情緒，對事物失去興趣。而內心深處就對世界、對人都失去信心，覺得呢個世界唔安全，覺得身邊嘅人唔可信，覺得自己無用。如果壓力反應响件事發生之後一個月仍然持續，就為之創傷後壓力症。
經歷過創傷嘅人其實好想克服呢D回憶，但奈何回憶「突襲」實在太恐怖，佢哋控制唔到幾時會有呢 D 感覺，只可以無助咁避開有可能會勾起呢D回憶嘅事物。身邊嘅人可能會覺得「大難不死已經好好彩」，「件事都過咗咁耐啦，應該要振作」，但佢哋其實身不由己，內心好痛苦，每次嘅「突襲」都好無助。當一個人感覺到自己喺生死邊緣嘅時候，驚同逃避其實係本能反應。嘗試從對方嘅角度出發、去感受對方嘅無助同恐懼、陪伴對方，都係重要嘅。人喺經歷創傷後的確係可以有所成長，但絕對需要時間去消化。如果情緒受到困擾、生活受到影響就陪佢哋去搵專業人士幫手啦。
社交焦慮症
當一個人持續六個月或以上，對社交場合經常有明顯嘅焦慮，而嗰啲社交場合係有機會比人批評 （例如：同唔熟嘅人傾計）、比人觀察（例如：同其他人食飯），或者需要表演（例如：向住一班人演講）既話 ，佢地可能正正面對緊社交焦慮症。有社交焦慮症嘅人會好擔心其他人會對自己焦慮嘅表現（例如: 面紅、心跳加速、出汗、抖唔到氣）有負面嘅評價，所以佢地會避開啲社交場合，又或者會超級緊張同驚咁捱過呢啲場合，而驚嘅程度同件事真實嘅可怕程度係唔成正比嘅。
佢地真係會好驚好驚好驚。試下幻想你最驚嘅嘢，可能係曱甴、打針、黑、鬼，有社交焦慮症嘅朋友就係咁驚社交架喇。但係佢地唔可以尖叫，只可以係內心不斷吶喊，或者成個人freeze咗。其他人唔明白佢驚啲咩，甚至會怪責同質疑佢地，「使唔使緊張成咁呀，個個都係咁講嘢架啦。」「你平時同我傾計好多嘢講架喎，都唔明你做乜對住一大班人就唔肯講嘢」，佢地都知咁樣唔好，佢地都知要大方得體，社交合宜，但真係好驚好驚，都幾辛苦架，所以身邊朋友嘅體諒、了解同嘗試去明白係十分之重要的。
拔毛症、摳皮症
拔毛症 (Trichotillomania) 同摳皮症 (Excoriation Disorder) 根據DSM-5係屬於強迫症類。有拔毛症或摳皮症嘅人會重複咁拔身體上面嘅毛髮或皮膚，可能係頭髮、眉毛、頭皮、手指皮，過程會獲得快感，同時亦都會不斷制止自己，拔毛或摳皮所用嘅時間可以數以小時計，有時畀人發現可能會感到尷尬同羞恥。有拔毛症或摳皮症嘅人會不由自主咁拔毛同摳皮，唔拔會好囉囉攣，拔毛同摳皮會有抒緩嘅感覺，好多時候都同壓力、焦慮有關。呢個情況其實好常見，只係情況亦令人難以啟齒，亦可能會有唔同嘅方法掩飾。
身邊嘅人可能會不停勸停，甚至會加以責備，但其實真係好難停，有拔毛症或摳皮症嘅人都會好難受，一方面因為停止唔到自己，另一方面儀容亦都可能受影響，其實都好不安。作為朋友，如果可以接納他們的行為，溫柔地問對方當刻嘅需要，可能係叫停、可能係由得佢、可能係純粹陪伴同聆聽，畀他們空間去做返自己，亦都可以直接問對方想其他人點樣提供支援。明白對方嘅掙扎，了解對方最近經歷緊嘅煩惱已經好足夠。